Imam Ali (a.s.)

Har Baar Mujhe Le Gayi Baazaar Muflisi
Har Baar Maine Apna Aqeeda Bachaa Liya
Maine Paddhi Thi Apni Hifaazat Ke Waaste
Naade Ali Ne Saara Ilaaqa Bachaa Liya
------------------------------------------------------------------------
Haasil Hai Murtaza Ko Yeh Sabqat Ghadeer Mein
Maula Bana Rahi Hai Risaalat Ghadeer Mein
Chehra Khateeb-e-Qaul-e-Salooni Ka Khil Uttha
Ki Mustafa Ne Aisi Khitaabat Ghadeer Mein

Jin Ke Dilon Mein Bughz-e-Wasi-e-Rasool Tha
Naasaaz Thi Unhi Ki Tabiyyat Ghadeer Mein
------------------------------------------------------------------------
Main Ahle Bait Ka Shaayar Hoon Naaz Hai Mujh Ko
Bade Badon Ko Mayassar Na Yeh Maqaam Hua
Zameen Ko Dekh Yeh Phooli Nahin Samaati Hai
Mere Ali Ka Laqab Jab Se Bu Turaab Hua
------------------------------------------------------------------------
Ali Ke Wasf Hain Itne Shumaar Kaun Kare
Yeh Kaam Tera Hai Parwardigaar Kaun Kare
Isi Liye Na Banaaye Khuda Ne Aur Ali
Shigaaf Kaabe Mein Ab Baar Baar Kaun Kare
------------------------------------------------------------------------
Faraaz-e-Daar Se Meesam Bayaan Dete Hain
Rahega Zikr-e-Ali Hum Zabaan Dete Hain
Ali Ki Jaa-e-Vilaadat Ki Jaise Baat Aayi
Kahaa Khuda Ne Hum Apna Makaan Dete Hain
------------------------------------------------------------------------
Ali Ka Naam Dilon Ke Kawal Mein Rehta Hai
Yeh Baadshah Akela Mahal Mein Rehta Hai
Ali Ki Raah Ke Hum Dono Hi Musaafir Hain
Magar Nusehri Zaraa Sa Khalal Mein Rehta Hai
------------------------------------------------------------------------
Har Koi Zamaane Ka Vali Ho Nahin Saktaa
Aur Mahar-e-Ausaaf-e-Jali Ho Nahin Saktaa
Mat Tol Ise Aql Ke Meezaan Mein Hargiz
Jo Aql Mein Aa Jaaye Ali Ho Nahin Sakta
------------------------------------------------------------------------
Fishaar-e-Qabr Ko Aisa Niddhaal Kar Doonga
Main Mushkilon Ki Tabiyyat Bahaal Kar Doonga
Ali Ke Naam Ne Taaseer Di Woh Zer-e-Lahad
Main Farishton Se Hi Koi Sawaal Kar Doonga
------------------------------------------------------------------------
Ulfat Ke Waaste Ho Yaa Azmat Ke Waaste
Yaa Ahle Deen Ki Khaas Ibaadat Ke Waaste
Hum To Yeh Samajhte Ke Ay Murtaza Ali
Kaaba Banaa Hai Teri Wilaadat Ke Waaste
--------------- ---------------------------------------------------------
Haidar Haidar Ali Ali Aur Maula Maula Bolega
Ishq-e-Ali Mein Paak Lahu Ka Qatra Qatra Bolega
Laakh Lage Bid'at Ke Pehre Fatwon Ki Is Basti Mein
Naara-e-Haidar Meri Qaum Ka Bachcha Bachcha Bolega
--------------- ---------------------------------------------------------
Naade Ali Jo Wird Zuban Karti Chali Gayi
Umre Rawaan Sukoon Se Guzarti Chali Gayi
Duniya Se Zikr Aale Muhammad Na Mit Sakaa
Duniye Yeh Aarzoo Hi Liye Marti Chali Gayi
--------------- ---------------------------------------------------------
Yaa Ali Tera Haseen Naam Bhalaa Lagta Hai
Teri Nisbat Se Yeh Islam Bhalaa Lagta Hai
Log Kehte Hain Tere Ishq Mein Kaafir Mujh Ko
Mere Dil Ko To Yeh Ilzaam Bhalaa Lagta Hai
--------------- ---------------------------------------------------------
Maula Ali Ki Shaan Zameen-o-Zamaan Se Poochh
Lauh Se Qalam Se Kursi Se Khud Aasmaan Se Poochh
Tere Pisar Ke Dil Mein Jo Hubb-e-Ali Na Ho
Bachcha Kahaan Se Laayi Hai Bachche Ki Maan Se Poochh
--------------- ---------------------------------------------------------
Saahib-e-Fikr-o-Nazar Haqq Ka Wali Kehte Hain
Kaashif-e-Kanz-o-Habeeb-e-Azali Kehte Hain
Jisko Dooba Hua Sooraj Bhi Palatkar Dekhe
Hum Use Apne Aqeede Mein Ali Kehte Hain
--------------- ---------------------------------------------------------
Paddhta Hai Jo Qur'aan Ko Tanzeel Se Pehle
Is Dahar Mein Woh Qaari-e-Qur'aan Ali Hai
Mat Pehla Musalmaan Kaho Mere Ali Ko
Pehla Nahin Pehle Se Musalmaan Ali Hai
--------------- ---------------------------------------------------------
Rab Ne Jise Ghadeer Mein Maula Bana Diya
Ummat Ne Baad Mein Use Chauthha Bana Diya
Anmol Sila Deta Hai Hubb-e-Ali Ka Rabb
Haidar Ke Zachaakhane Ko Qibla Bana Diya
--------------- ---------------------------------------------------------